Aweiung

Service vun de Kierfechter

Den 23. Abrëll 2025 gouf dat neit Gebai vum Service Cimetières, matten am Märeler Kierfecht, ageweit. Dësen neie Site moderniséiert d’Servicer fir déi 14 Kierfechter vun der Stad Lëtzebuerg.

De Projet regruppéiert e puer Atelieren, wéi eng Schräinerei, eng Schmëdd, eng Wäschkichen awer och e Wäschberäich. Et goufen och eng sëlleg professionell Geräter installéiert: Staubsauger, Héichdrockreiniger, Anlage fir d’Stiwwelen ze botzen, fir d’Aarbechtskleedung ze dréchnen, Rullkran, Schmëdd, verschidden Ateliersmaschinnen, Gabelstaapler, Schlësselschief oder och nach Lackéierkabinnen.

Spezialtechniken

• D’Gebai mat enger certifiéierter Energieeffizienzklass A ass iwwer en 250 kW-Echangeur un de Fernwärmereseau vun der Stad Lëtzebuerg ugeschloss. D’Anlag ass op d’Heizbesoine vun deem neie Gebai zougeschnidden a kann an Zukunft och d’Kapell an der noer Géigend alimentéieren.
• Zwou Lüftungsanlage mat héicheffizienter Wärmerückgewinnung suerge fir eng gutt Loftqualitéit an den administrative Raimlechkeeten, dem Iessraum, de Sanitärberäicher an de Vestiairen. D’Heiz-/Killleeschtung gëtt iwwer 4-Rouer-Gebléiskonvektoren am Gebai verdeelt, déi fir e bessere Confort vun den Notzer suergen.
• Eng 30 kW-Kälteanlag um Daach suergt an de Summerméint fir Ofkillung.
• Fir de Beräich Vestiairen/Kichen ass eng sanitär Waarmwaasseropbereedung iwwer e Späicher, dee vum Fernwäremereseau gehëtzt gëtt, virgesinn.
• Fir eng rationell Notzung vum Waasser sécherzestellen, goufe Pissoiren ouni Waasser ageriicht an d’Reewaasser vun den Diech gëtt recuperéiert, fir de Bewässerungssystem ze alimentéieren.
• Um Daach vum Verwaltungsgebai gouf eng Photovoltaikanlag installéiert. Mat hirer Leeschtung vu 27 kWc erméiglecht si eng Joresproduktioun vu ronn 27 000 kWh/Joer.

Fir méi ze wëssen, klickt hei.